Hasadaon na mamboan pasupasu

Jes 2.1-3

by.gr.abnerpanjaitan

----------------------------------

Panurirang Jesaya (Proto Jesaya) satingki si Mika di panggomgomion ni raja Ahaz, 733-721 adorang so Kristus dohot ditingki ni raja Hiskia di taon 720=693 adorang so Kristus. Boi do jahaonta turpuk on di MiKa 4.1-3. Diholsohon si Jesaya do pangalaho naung sega/lumlam di tongatonga ni bangso Israel lumobi di Jerusalem, ala dosa ni bangso i na mamisati pangalaho na pogos, songon i songoni nang dosanasida tu halak na ro tu bagas joro. Alani marsitutu do si Jesaya paingothon bangso Israel asa disolsoli dosana. Songon hamamago ni Israel ala ni dosana, songon i do nang hamamago ni Juda ala pangalosionna di patik ni Debata. Halembaon ni bangso mangguruhon patik dohot hata ni Debata,ima kehancuran i, ai gabe ro ma harajaon na asing marporang dompak nasida. Tutu di tingki ni si Jesaya hira lam moru do peranan ni bagasjoro i, ai lam gale do ngolu parugamaon ni bangso Israel. Nunga tung torop bangso i na dipengaruhi debata baal, jala marsomba nasida tusi. Songon hamamago ni Israel ala dosana, songon i do nang hamamago ni Juda ala pangalasion di patik ni Debata. Alani i ma dilumbahon si Jesaya taringot tu uhum ni Debata, alai dung masa uhum i ro ma Debata patuduhon asi ni rohaNa, suruonNa ma Mesias mangapuli nasida, huhut pasadahon pasipasi ni bangso i sian habuangan; jala mardamedame ma bangso i tu bangso. Marpungu angka bangso tu dolok ni Jahowa manghalashon haroroNa. I ma na pinasahat ni turpuk on.

1.       Marsada nang pe marasingasing hadirionta

Ndang holan taringot tu uhum na dilumbahon si Jesaya, dipasahat ibana do nang taringot tu bagabaga apulapul na bangso na hona uhum i. Dibaritahon si Jesaya, na apulon ni Debata do nasida, paluaonNa do nasida sian na hansit i. Patupaon ni Debata do sada tingki na imbaru di nasida mangalehon las ni roha ala pajongjongon ni Jahowa ma bagasjoroNa di Jerusalem, na boi idaon ni sude bangso di inganan na timbo. Ndang holan bangso Israel na memereng jala na ro tusi, alai saluhut bangso. Marhite patik I ditonahon tu nasida dos do jolma I di Debata(pat Ul 10.28-34), ndang adong jolma na sangap dohot na lea; ndang adong parasingan ni jolma di Debata. Diorai nasida marhatobanhon dongan jolma, ala dos do jolma I di jolo ni Debata manang dohononta ndang adong pembangian kelas, kasta di parsaoran ni jolma di jolo ni Tuhan i.

2.       Marsada dibagasan na mansihaholongan

Ditompa Debata hita dibagasan parasingan(pluralisme,keberagaman) asa marhite parasingan I boi ganup jolma marsitumpahan manang mansilehonan. Ndang pangkeon parasingan i tu parbolatbolatan alai tu na mansitumpahan do. Ditompa Debata hita marasingasing asa marhite i boi hita saling melengkapi (Kol 3.15). Keberagaman, parasingan i ndang siagohonon alai parhaseagon tu ngolu na mansitumpahan(berbeda walaupun satu, satu walaupun berbeda). Aha na mangarahut ngolu na dibagasan hasadaon, ima holong ni roha. Molo holong i mangarahut hasadaon i ndang muramura be na mansilatean, mansiagatan dohot na mansihatahataan di angka hahurangan ni dongan, ai sada ni roha na mangarahut. Tuhan Jesus pataridahon holong ni rohaNa tu jolma ditinggalhon do hasangaponNa jala diramuri do diriNa jala gabe pangoloi do Ibana(Fil 2.5-8). Rade do halak manghophop donganna molo nunga adong holong ni roha di ibana(ptds 1 Petr 3.10-11)

3.       Hasadaon i do gogo

Rim ni tahi do gogona tampak na do tajomna, ninna umpama Batak patuduhon ringkot ni hasadaon di ngolu ni jolma. Umpama I pasahathon,molo adong hasadaon boi do patupaon sada ulaon nang pen dang adong arta manang hepeng, sabalikna nang pe godang arta dohot hepeng molo so adong hasadaon, ndang tulus patupaon sada ulaon. Domu tusi do pinasahat ni thema ni Minggu on di Almanak HKBP “Saroha, Sapanghilalaan, Sahaporseaon”, manang tapadomu tu pandohan”Kerukunan Satu dalam kepelbagaian”. Marhite thema I disungguli hita asa olo marsada dohot dongan, ai hasadaon I do parbue ni haporseaon di Jesus dohot parbue ni haluaon na pinasahat ni Tuhan i tu hita(ptds Joh 17.21). Amen