Na denggan i ma pareahi

Ulaon na mamatamatahon do sada ulaon na mansai maol di zaman na maju on na tagoari globalisasi. Mamatamatahon dos doi ulaon na mangaramoti dobot pamanathon, paingothon dongan !!! Ai sipata nunga lam mabiar halak paingothon dongan ala boi do parohon na hurang tabo begeon alus, " aha naniantoanmu disi, dirim ma atur/ paingot". Ido gabe patubu roha na cuek manang ndang perduli di angka na masa di dongan, lam ngali roha holong tubu ma sikap sipature diri na be di angka ngolu on. 

Didia do hataridaan manang hasurungan ni ngolu na mar-Tuhan?  Manang aha do parasingan halak na mian dibagasan Tuhan diangka ulaon na denggan? Parjolo siulahononta ima paturehon parange nang hata asa gabe dalan patuduhon parange na denggan di dongan.   Mangihuthon barita, alasan warga China menjadi ragu laho mangurupi/menolong ala khawatir akan disalahkan! Tetapi apapun alasanya, dunia telah mengecam mereka sebagai warga yang tidak berperikemanusiaan. Sejumlah pengguna media sosial di China mandok pangalaho na so manusiawi i tudutudu masyarakat na sega/sudah hancur moral/parangena. 

Boi sajo do hita so mangalehon roha mangulahon angka na denggan dohot alasan na tatanda halak na naeng taurupi, manan ndang olo hita repot dohot alasan na so logis. Alai marhite habisuhon sian Tuhan i do na gabe mangurupi laho manghilalahon/peka dan bijak di na manuan angka na denggan tu saluhut halak na memang mangharingkhon pangurupion sian hita. Marhite i ma unang marnaloja hita patupa na denggan i. 

Acara Bona Taon

Acara Partangiangan Bona Taon Huria

(Pamuhai ni Partangiangan Lingkungan)

Di

 HKBP Panei Tongah Ressort Panei Tongah

Sabtu, 02 Pebruari 2013

01. Parangaradeon diri:

L    :     Marolopolop tu Debata ma hita. Taendehon ma hamuliaon ni goarNa. Marmulia ma tabahen pujipujianNa. Tadok ma tu Debata: Tung na songkal do angka pambahenanMu. Binahen ni hinatimbul ni gogoM, ingkon marsomba tu Jahowa ma hita, jala taulahon nanidokNa.

H   :     Saluhutna silehonlehon na denggan dohot nasa ulibasa na mauliutus, na ro sian banua ginjang do i, sian Ama ni angka hatiuron, ndang adong anggo di Ibana manang halinu ni pangkusoran. Taingot ma! Na mamolus do portibi on rap dohot pinangido ni rohana, alai na mian ro di saleleng ni lelengna do na mangulahon lomo ni rohaNa. Halinu sambing do jolma i mardalani, alogo sambing do digulut-gulut, sai papunguhon do ibana, hape ndang diboto manang ise na mangahutisa muse. Molo songon i, aha ma dohononta di adopan ni Debata Pardenggan basa i?  

L    :     Ditompa Debata ma roha na ias dibagasan hita, jala dipaimbaru ma tondi na marsihohot dibagasan hita, asa tung tarulahon hita lomo ni rohaNa. Godang ma tongon na binahen ni Jahowa tu hita, jadi marhilas jala marolopolop ma hita disi.

H   :     I do tutu. Masa ma di tingkim haporseaon, hinagok ni angka hatuaon, hapistaran dohot parbinotoan, biar mida Jahowa pangalapan arta di hita. Taingot ma! Angka na marhaposan tu Jahowa maruli hagogoon mardapot-dapot, gabe marhabong ni lali laho manaek. Marlojongi hita, ndang olo loja, mardalani hita na so jadi mandate.

L    :     Antong! Sian nasa rohanta, tasombahon ma olopolop ni tondinta di na rap hita mangendehon: Marolopolop tondingki ai naung di tobus Jesus i…..!

S: Mangendehon BE. 435: 1 + 3 ”Marolopolop tondingki”

1.   Marolopolop tondingki, ai naung ditobus Jesus i. Hamu sude bege ma i sai las rohangku mandok i. Sonang ni tingki i dung jumpang Jesus Tuhanki. TondiNa mangajari au, tarbaen marlas ni roha au. Sonang ni tingki i, dung jumpang Jesus Tuhanki. ~~jongjong~~

2.          Tu Jesus sahat ngolungki saleleng ni lelengna i. Rap dohot au endehon ma endengku na imbaru da. Sonang ni.......!

02. Votum – Introitus – Tangiang:

L    :  Marhitehite Goar ni Debata Ama, anakNa Tuhan Jesus Kristus dohot Tondi Parbadia, na manompa langit dohot tano on. Amen. Mandok mauliate ma hamu di Jahowa, ai na basa do Ibana, ai ro di salelenglelengna do Asi ni rohaNa i. Sai urupi ma hami ale Jahowa Debatanami, Sai tumpahi ma ngolunami hombar tu asi ni rohaM.

                   H:Tahalomohon ma pangajaran ni Jahowa, jadi lehononNa ma tu hita napinangido ni rohanta. Tapasahat ma dalanta tu Jahowa jala tahaposi ma Ibana asa Ibana paturehon.

L    :  Taoloi ma Jahowa marhitehite las ni roha, ro be ma hita tu joloNa marhitehite olopolop. Taboto ma: Jahowa do Debata; Ibana do na jumadihon hita, jala Ibana nampuna hita, bahen bangsoNa dohot birubiruNa.

S    :  Martua ma ganup na manghabiari Jahowa, na marparange di angka dalanNa i. Sai panganonta do na niula ni tanganta, martua ma hita jala sonang.

L    :  Tapuji ma Jahowa, ai Pardenggan basa do Ibana; taendehon ma goarNa, ai hasudungan ni rohanta do Ibana. Haleluya !!! Martangiang ma hita: Ale Tuhan Debata, huboto hami, ndada ala ni gogo dohot habisuhonnami umbahen tarbahen hami tolhas tu taon 2013 on; tung holan ala Asi ni rohaM sambing do. Hupasahat hami ma ngolunami tu Ho mandalani ariari na pinasahatMu tu hami di taon 2013 on. Manang dibagasan las ni roha manang arsak ni roha hami, holan Ho sambing ma huhaposi hami. Ala ni, tambai ma nang haporseaonnami, asa tongtong hami marsigantung tu Ho. Urupi jala pargogoi ma hami marhite tondiM, asa tulus marolopolop, mariaia tondinami sumombahon pasupasu nanilehonMi tu hami songon parbue ni haporseaonnami na sintong di adopanMu. Hupasahat hami ma tangiangnami on tu Ho, marhite Tuhan Jesus Kristus na pasadahon hami mandok mauliate tu adopanMu na badia i. Amen. ~~~ Hundul ma hita~~~

03. Koor: NHKBP

04. Epistel :  Jeremia 1: 4 - 10

L    :  Hamuna angka dongan! Tajaha ma turpuk Epistel di pamuhai ni partangiangan Wijta di borngin on, i ma na tarsurat di Jeremia 1: 4 – 10 : Jadi na ro ma hata ni Jahowa tu ahu mandok songonon :

H   : Tangan so hujadihon dope ho di bortian nunga hutanda hian ho; jala tagan so ruar dope ho sian ampuan ni natorasmu, nunga huparbadiai hian ho: hupabangkit ho gabe panurirang tu angka bangso.

L    :  Dungi ningku ma; iale Tuhan Jahowa, ida ma ndang huboto manghatai, ai na bajar dope ahu.

S    : Jadi ninna Jahowa ma mandok ahu : unang dok ; na bajar dope ahu. Ai manang tudia pe ho husuru, ingkon tusi do laho, jala manang aha hutonahon tu ho, ingkon ido hatahononmu.

L    :  Unang ho mabiar maradophon nasida, ai ahu do donganmu, paluahon ho, ninna Jahowa.

H   :  Dungi dipatoltol Jahowa ma tanganna, jala dijama pamanganghu, jala ninna Jahowa mandok ahu; ida ma nunga sahat hulehon angka hatangku tu bagasan pamanganmu

L    :  Ida ma, hupabangkit do ho sadarion mangaranapi angka bangso dohot harajaon, laho mangurati dohot maniaphon, mangago dohot mangaloha, paulihon dohot manuan. Intap ni do sahatna. Martua do angka na tumangihon Hata ni Debata, jala na umpeopsa. Amen.

05. Koor: PT.Pokkan-Immanuel

06. Marende BE. 707: 1 + 3 “Hagogoon dohot apulapul”  

1.       Hagogoon dohot apul-apul do dilehon Tuhan i tu au. Ganup ari au ditogutogu, ganup tingki di ondingi au. Ai hombar tu lomo ni rohaNa, do dilehon Tuhan i tu au. Ro marsorin arsak las ni roha, haporseaonku di patau.

3.      Songon Ama do tu anakhonna, holong ni Tuhanta i tu au. Ndang mansadi pangurupionNa, hombar tu padanNa na tu au. Debata Amanta na di ginjang, i do haposanku sai tongtong. Dipangiringiring ni tanganNa dame sonang do rohangkinon.

07. Tangiang Pangondianon:

08. Koor: Ina Kamis & Ama

09. Marende BE. 697:1 - 2  “Molo Ho do huihuthon”

1. Molo Ho do huihuthon, dame sonang rohangki, sai horas jala martua nasa na hinophopMi. Ref. Ho tongtong ihuthononku, Jesus na palua au. Ho sambing do oloanku alani martua au.

2. Hupelehon ma diringku mangihuthon lomoMi, ndada be na olo salpu na manggohi rohangki. Ho tongtong ihuthononku....!

10. Jamita: Mateus 10.5-15

11. Marende BE. 714: 1-P.Pelean “Tuhan na marmahan hami”

1.       Tuhan na marmahan hami togu hami ruasMon. Lehon dameMi di hami angka na hinophopMon. Tuhan Jesus Sipalua, Parmahani ruasMon. Tuhan Jesus Sipalua, parmahani ruasmon.  

      2.         Tuhan Parmahan haposan dongan na sumurung i. Sai padao pangunjunan togu ma na lilu i. Tuhan Jesus Sipalua, pasupasu ruasMi. Tuhan Jesus Sipalua, parmahani ruasMi.

12. Panghirimon Mangulahon Hata Ni Debata:  

L   :  Hamuna angka dongan na hinaholongan! Nunga marsaringar Hata ni Debata tu bagasan rohanta na mandok: "Sadari on, di na binegemuna soaraNa, unang ma papir hamu rohamuna, songon nasida na tangkang roha uju i. Taingot ma! Holan ala ni haporseaonta di Jesus Kristus do malua hita sian ragam ni dosa dohot hajahaton, ndang dibaloshon tu hita saluhutna dosanta. I do sihamauliatehonon ni rohanta dinapinaloasNa HuriaNa tolhas di taon 2013 on.

A   :  Dipagomos Debata ma rohanta manundalhon dosa i, Dipaganda ma ringgasnta mangulahon HataNa. Asa unang lalap rohanta di portibi on.

I     :                  Sai diapuli Debata ma rohanta dohot holong ni rohaNa, jala dijalo tangiangta ala denggan ni basaNa. Dipadao sude jea sian ngolunta asa unang marsak hita, jala asa lam togu rohanta manghaporsai Ibana.

N  : Dipaian Debata ma HataNa i mangapuli rohata, dipadao  sude pangago sian hita asa gok las ni rohanta mangoloi Ibana ganup ari.

L   :  Hamuna angka dongan! Pos ma rohanta di Debata, lehononNa do las ni roha dohot panghirimon na mangolu tu hita, nang pe marombas-ombas arsak nang las ni roha taadopi di taon naung salpu i. Alai dumenggan jala tumonggi ma daionta asi ni rohaNa di taon 2013 on. Ndang tarasam hita tahe denggan basa ni Jahowa mangaramoti HuriaNa sahat tu nanaeng patupa. Alani, patut tapuji Ibana jala taoloi na nidokNa. Nuaeng pe, tapahibul ma rohanta manombahon tangiang panghirimon ni rohanta mangulahon Hata ni Debata. Lambok ma taelekhon tu adopanNa nabadia i: “Sai unang jujur dosa i, binaen di taon na salpu i...”

                        ~~~~Jongjong ma hita saluhutna~~~~~

S    : Mangendehon BE. 70: 4 – 5 ”O Jesus Sipangolu au”           

4.  Sai uSai unang jujur dosa i binaen di taon na salpu i. Urasi hami sasude asi rohaM di hami be. Urasi hami sasude, asi rohaM di hami be.

5.   Urupi hami mangoloi PatikMu jala pargogoi. Lao manundalhon dosa i, nang nasa jat ni rohangki, lao manundahon dosa i, nang nasa jat ni rohangki.  

13. Tangiang Pelean-Ale Amanami – Pasupasu –Amen 3x diendehon

Diparar Debata do hita Gabe NaposoNa

Sermon Jamita Minggu Sexagesima

Jeremia 1.4-10

Minggu 03 Pebruari 2013

1.          Martimbanghon angka panurirang na asing, adong do manang piga keistimewaan ni panurirang Jeremia (a). Nunga ditotophon Debata ibana gabe panurirang andorang dibortian ni inana dope si Jeremia. (b). Nunga diparbadia Debata ibana andorang so ruar dope sian bortian ni inana, asa talup ibana gabe panurirangNa. (c). Secara langsung do ibana dipabangkit Debata gabe panurirang tu angka bangso, ndada holan tu bangso Juda. Mansai tangkas do didok di ayat 9; Nunga sahat hulehon angka hatangku tu bagasan pamanganmu. (d). Mansai tangkas do dipasahat Debata angka tanggungjawab siulahononna songon panurirang secara negatif didok ; Mangurati dohot maniaphon, mangago dohot mangalaho, dungi secara positif didok muse; paulihon dohot manuan(ay 5,10).

2.        Alai ndang manghorhon haginjangon ni roha keistimewaan ni panjouon ni si Jeremia i. Alai dihorhon hasurungan ni panjouonna i do hajojonokna tu Debata, di parsaoran dohot di panghobasionna songon panurirang. Mansai rosu situtu do parsaoran ni panurirang Jeremia dohot Debata. Hira na maraleale do nasida, songon na targombar sian panghataion ni si Jeremia dohot Debata di bnd 20.7-20. Alai nang pe songoni hira na maraleale nasida, tongtong do dipatuduhon panurirang Jeremia serep dohot unduk ni rohana mangoloi Ibana, hombar tu pandok ni Debata : Manang tudia pe ho husuru, ingkon tusi ho laho, jala manang aha hutonahon tu ho, ingkon i do hatahononmu (ay 7). Alani mansai tangkas do dipatolhas si Jeremia hata ni Debata, ndang olo ibana palemeslemes jamitana, atik pe mansai koras jala sogo roha ni halak manangihonsa. Memang laos ala ni jamita na tegas jala koras i ma gabe godang parungkilon dohot hasusaan diae ibana. Alai ndang mabiar ibana ai pos do rohana di hata ni Debata na mandok ; Unang ho mabiar, maradophon nasida, ai sai Ahu do donganmu, paluahon ho (ay 8).

3.        Angkup ni i, atik pe godang hasurungan ni panjouonna, alai ndang gabe halak na istimewa ibana di jolo ni natorop. Mansai tangkas do dirajumi ibana dirina dos dohot halak na asing, na rap tinompa ni Debata.   Mansai tangkas do panghilalaanna i tarida sian pandohanna, songon na ni dok ni halak Batak : ramba na poso do iba, na so tubuan lata, naposo dope iba, jala na so umbotoo hata (ay 6). Alai laos disi ma dipatuduhon si Jeremia, ndang na naeng marsidalian ibana manang naeng manulak panjouon ni Debata. Ai marhite pandohan i dipatedek si Jeremia hagaleonna, laos huhut haradeonna marsiajar. Alani do umbahen dialusi Debata ibana: Unang dok; nab ajar dope ahu (ay 7). Singkat ni ganggu ni rohana mangula ulaon na pinasahat ni Debata gabe tubu pos ni roha dohot hatauon gabe naposo ni Debata. Sahat tu sadarion on pe tongtong do diparade Debata na ringkot di manang ise na rade mangoloi joujouNa. Lapatanna tung so sundat do sangkap ni Debata ala ni hagaleon manang hahurangan ni angka naposoNa; ai marhuaso do Ibana pauliulihon saluhutna asa tung saut sude sangkapNa marhitehite angka naposo na pinabangkitNa i.

4.        Marhite panjouon ni panurirang Jeremia i, naeng ditogutogu hita asa lam tangkas mangoloi Debata laho mamboan haimbaruon di masyarakat, di huria dohot di tongatonga ni masyarakat. I ma marhitehite na mangurati dohot maniaphon angka pangalaho na robi, asa jumpang parsaoran na gok dame dohot las ni roha. Ingkon lohaon jala bolongkonon ma nasa na mangambati hita mangulahon na nidok ni Debata, asa sahat pasupasu dohot hangoluan sian asi ni rohaNa. Dungi pinauli ma roha dohot pingkiran na imbaru jala sinuan ma holong ni roha, asa lam marbungaran harajaon ni Debata di portibi on. Songoni ma ganup halak Kristen dijou Debata gabe sira dohot panondang ni portibi on (Mat 5.13-14).

5.        Molo tarajumi dirinta halak na gale, na metmet, siotik partubu manang somal didok golongan minoritas, taingot be ma na dipauli Debata do haimbaruon di ngolu ni angka ni angka bangso marhite na pabangkit angka na gale dohot na metmet (jaha Ul 4.10-12). Alai dibagasan unduk dohot serep ni roha tajalo ma hagogoon dohot hatauon sian Debata marhite na manghangoluhon hataNa, songon na sinohalan ni panurirang Jeremia.  Molo dibagasan hita hasintongan ni hata ni Debata, gabe ndang mabiar be hita maradophon manang aha pe di portibi on. Gariada saleleng mangolu hita gabe pangoloi, na patolhashon dohot sintong sude na tinonahon ni Debata. Antong, marlas ni roha ma hita molo diparar Debata hita gabe naposoNa, jala tapasaut ma nanidokNa marhite pangulmiton ni ngolunta ariari. Amen

SERMON EPISTEL MINGGU LETARE

Jes 66.10-14

I. Patujolo;

Marsak do bangso Israel ala ni parngoluon nasida na tinaban ni bangso na gogo, ima bangso Asyur dohot Babel. Gabe songon bangso na bebas muse nasida songon ompunasida uju di tano Misir. Jerusalem pusat ni harajaon dohot ugamo nunga tarulang, jala angka huta nunga sega, jala pandaraman pe ndang tontu be. Godang ma siarsakhonon ni bangso i. Mansai hansit do parniahapan ni bangso Israel hatiha i dihabungan nasida, jala masihol do nasida sadihari ma boi mulak tu Jerusalem. Di sude inganan dibereng nasida ma angka kehancuran, huta na nihasiholan nasida i nunga gabe puingpuing naung limutlimuthon. Nuaeng sihol ni rohanasida nunga gabe saut ai mulak nasida tu Jerusalem , nunga gabe patar aha naung didok Debata tu bangso i, di Jesaya 40:1-2 ”Apuli, apuli hamu bangsongki, ninna Debatamuna. Hata apulapul ma dok hamu tu roha ni isi ni Jerusalem, jala jouhon hamu ma tu nasida: Nunga marujung parungkilonna, ai nunga salese dosana i, ai nunga dijalo sian tangan ni Jahowa silompit dua singkat ni saluhut dosana.Hape di tingki na mansai optimis nasida tu masa depan na mansai uli, nuaeng dipaadop do nasida tu kenyataan i ma. Disurirangkon si Jesaya ma haluaon ni bangso i sian angka arsaknasida i. Didok si Jesaya ma: Marlas ni roha ma hamu rap dohot Jerusalem, jala marolopolop mida ibana sude hamu ale angka na holong roha di ibana! Marlas ni roha situtu ma rap dohot ibana sude hamu ale angka na marsak roha mida ibana na sai laon!

II. Hatorangan:

1. Marlas ni roha di partondion

Anggo apala naneng dohonon ni si Jesaya marlas ni roha rap dohot Jerusalem i ma las ni roha di partondionta do, ai molo nunga marlas ni roha di partondionta, tarbahen marlas ni roha do di pardangingon. Adong manang na piga las ni roha silehonon ni Debata tu bangso i, ima: Manusu jala mahapan di apulapul ni Debata ma nasida marhite na paluaonna nasida sian angka arsak jala lehononna nasida sipanganon. Marsobur sian hamuliaon ni Debata ndang na olo marsak i ala ni godangna. Nunga diparade Debata kebutuhan ni bangso i sisoburonna(sipanganon dohot si inumon) na tau hangoluan ni jolma di pardangingon dohot di partondion. Mangolu dibagasan dame do na ummarga sian ngolu na mahap di sipanganon jala sombu uas siinumon. Debata sandiri padamehon jolma i marhite na mangalehon roha dame tu ganup jolma. Gabe dao ma porang manang parmusuon. Diapuli Debata do bangso i songon pangapulion ni inaina tu anakna. Pangapulion ni Debata tu bangso i marhite hasation, halambohon diotapi do rimasna songon na binahen ni ina laho mangapuli.

2. Holong do roha ni Debata mida naposoNa

Bangso Israel targoar do i bangso na hinaholongan  ni Debata, alani patut do nasida manghaholongi Debata. Dipatuduhon Debata do holong i rohaNa tu bangso i, tu naposoNa. Dihaholongi marhite panogunoguonNa tu bangsoNa. Agia pe so dihaholongi bangso i Debata, alai anggo Debata torus do manghaholongi nasida. Ala ni hatangkangon ni bangsoNa i di uhum Debata ma nasida sahat tu tarbuang. Alai diapuli Debata do nasida muse:dipasobur, dipadame jala diapuli do nasida. Alani i patut marlas ni roha jala marolopolop nasida mida Debata. Songon na hinatindanghon ni Panurirang Jeremia 29:11”Ai nunga tangkas huboto sangkap angka na husangkapi taringot tu hamu, ninna Jahowa, sangkap hasonangan do tahe ndada tu hamagoan, asa ahu mangalehon tu hamu ujung na hinalungunhonmuna”.

3. Las ni roha na sian Tuhan i do gogonta

Las ni roha na manontong do na naeng lehonon ni Debata tu angka na porsea di Ibana, i ma haluaon, surgo hasonangan i; disi ma angka na porsea marlas ni roha saleleng ni lelengna( Heb 12.2). Las ni roha na so hea dope di dai jala dihilala manang ise las ni roha si songon i, i ma na pinarade ni Debata. Dibagasan kondisi songon dia pe, ndada boi las ni roha na sian Tuhan i diotapi na masa di portibion. Dipatuduhon Debata do las ni roha na hot dibagasan tingki naung binuhulNa. Dipabotohon Debata do las ni roha i tu bangso na tertindas dohot tu bangso na mabiar di hataNa. Debata sandiri berinisiatif mambahen las ni roha tu bangsoNa, tongtong do Debata aktif mangurupi angka na porsea di Ibana. Margogo do angka naposo ni Debata papatarhon tangan ni Jahowa tu angka na mangadopi hamaolon jala margogo laho mangurupi jolma asa malua sian rimas ni Debata tu angka musuna( Psalm 130.7).

IV. Panimpuli:

Sai disoarahon huria do tu angka ruas ni huria asa dibagasan las ni roha mangadopi angka krisis namasa dipartingkian on. Mangoku/mamparhatutu las ni roha ni Debata na tongtong mangula dibagasan ngoluna laos disi do ibana tongtong patudu parsihohoton dipangatur ni Debata dibagasan ngolunta. Ringkot ma nang patudu sikap berserah tu Tuhan i, alai tutu ndang laos pasif di angka pangulaon siganup ari. Taula ma angka ulaonta alai tongtong ma mangasahon dohot mardonganhon Tuhan i( Pil 4.5). Dibahen i tahaporseai ma Tuhan Jesus Kristus, na tuk manarihon ngolu pardangingonta dohot partondionta. Marparange ma hita hombar tu hata ni Tuhanta, ai ganup halak na mangaradoti hat ni Tuhan i taruli hangoluan na salenglelengna ( Joh 8.51). Usul Thema;

1. Marlas ni roha jala marolopolop digabasan Jahowa (Jes 61.10)

2. Dihaholongi Debata do na porsea di Ibana (Psalm 20.8)

3. Parbuehon ma na tama di Tuhan i