Hehe Ma Ho

by.gr.abnerpanjaitan

Patujolo;

Panguloan ni Tuhan Jesus tung mansai manghorhon las ni roha do tu angka natorop uju di portibion Ibana.Torop do na hansitan siala ragam ni sahit dipamalum; suang songon i nang sibolis dipabali Ibana di hatihai (Mrk 2.3). Hamalumon ni sude angka sahit ni jolma i gabe sada barita nauli, jala sar baritana di sandok Galilea uju i. Andorang so i nunga he Jesus di laho tu Kapernaum mangajari di parguruan sinogoge tongon di ari Sabat, ala ni sahala ni pangajarionNa pola longang sude na umbegesa (1.21-22), jala tongon do hatiha i sahalak partondi na hodar mangganguhi, laho mangalo Jesus, alai disonggahi Ibana do na marsahit i jala malum dihilala (1.25).Laos di Kapernaum do muse dipamalum sahit ni simatua boru ni Simon na panepaneon. Dihatiahai i ma gabe godang na ro laho mamboan angka sahit na be tu jolo ni Tuhan Jesus. Molo dung dipamalum sahit ni jolma i, sai holan hata na jempek do dipandohon "Hehe Ma Ho" dohot poda "Unang Dipaboa Tu Manang Ise", jala molo nunga malum ingkon laho ibana paboahon tu Malim, asa mamelehon pelean tu Debata, hombar tu patik ni Musa, na marlapatan ndang disoadahon Jesus aturan parugamoon ni halak Jahudi molo mambahen tanda haholongon Ibana uju i.

Hatorangan;

1. Ndang pintor mandele di partingkian(tidak putus asa dengan situasi). Molo taida sikap ni angka na marsahit na pinamalum ni Jesus, ndanda na mura pajumpang dohot Ibana, alai butuh proses na ganjang, dikucilhon. Taida do na masa di huta Kapernaum, ala barita na binege ni natorop taringot angka halongangan na pinatupa ni Jesus tung torop do na ro hatihai gabe ndang hasiatan alaman, ai jabu pe nunga ponjot laho pajumpang dohot Jesus. Adong na peak huhut joujou tu Ibana, alai adong muse do na mangulahon na mansai luar biasa ima sahalak na sarion na peak niusung ni opat halak. Ala so tarbahen be masuk laho mandapothon Ibana gabe sian tarup ni bagas i nama ditantan dung diloha tarupna. Ndang gabe putus angkal dohot mandele di situasi i nasida. Alani perjuangan i gabe peak do tongon di jolo ni Jesus na sario i huhut mangido hamalumun ni parsahiton sian Jesus (Mat 2.4), jala jumpa las ni roha do ibana "Nunga sesa angka dosami"!(ay 5). Adang do halak na marsahit tingkion na so olo mandele nang pe naung leleng marsahit? Alus na adong! Adong do halak Kristen na mandele molo songon na hansit di ngolu na? Adong! Nuang na gabe sungkunsungkun di horong dia do hita nuang dihatiha na songon angka parungkilon dohot hapaeton? Taalusi ma sian rohanta, atik boha do tong dope sai golap panghilalaanta uju masa na maol, songgop parungkilon na mambahen hita ndang taboto sitondongonta. Atik boha do di na taadopi sude na sahit gabe lam bagas dosa na mambahen hita lam tu posi. Alani naeng ma taboan dirinta tu jolo ni Tuhan i, unang ganggu hita. Taingot ma  nunga sesa dosanta dibahen mudar ni Kristus i, diburi hita manjalo hangoluan dohot hamonangan i. Asa tung pos rohanta mandok: Tuhan i do pangurupi di ahu, ndang mabiar ahu; aha ma bahenon ni jolma tu ahu? (Heb 13.6)
2. Naeng patar hagogoon ni Debata (kuasa Tuhan yang nyata). Ndang dibatasi inganan  huaso ni Debata dingolu ni angka na porsea i, ndang dibatasi hariburon gabe sundat ulaon asi ni roha dipatupa Jesus, ndang dibatasi tarup ni jabu i hasesaan ni dosa na jinalo ni na marsahit i. Marnida hagogoon dohot hasesaan ni dosa na pinatupa ni angka na porsea i, gabe adong do perubahan statusnta na ro tu Jesus. Ai hinorhon ni hagogoon do gabe tubu panindngion ni si Job na mandok;"Ibana patimbulhon halak na tarjempol dohot patimbulhon hatuaon tu halak na marsak marroha" (Job 5.11). Dihorhon ni haporseaon ido idaon ni na marsahit hamalumon sian huaso ni Jesus. Mangihuthon poda hajahudion, sude parsahiton marharoroan sian 'dosa tertentu', manang na ro i sian diri ni na marsahit manang na ditean sian natorasna be. Alai dia do alus ni Jesus " Alai bahen hasangapon ni Debata do i, asa marsangap Anak ni Debata marhite sian i" (Joh 11.4). Marragam na niae ni jolma ditingki on gabe susa pingkiran alani angka sahit, ekonomi na so manontu, hasusaan ni lingkungan hidup, israna banjir na sai tongtong mamboan korban materi, jiwa dohot inganan na so boi pasonanghon rohanta. Taingot do korban ni "Situ Gintung" na masa di Jakarta, pola do manusai dongan. Aha do mambahen i, ra tubu ma dirohanta alani pangalaho ni jolma i do na so bersahabat be tu angka na tinompa ni Debata, uli do ditompa alai adong na manegai huhut na so manganturehon alam i gabe susa ma ngolunta. Adong do huaso ni Debata di namasa i tahilala naeng patar? Diganup iganan boi na so tuk tarpikiran ni jolma, dilehon Debata do tu hita huaso laho manjaga jala mangaramoti sude na di portibion. Ndang na tarlambat hita mandapothon Tuhan alai adong dope tingki parasian. Las ni roha do dipatongon Debata, sonang ni roha, "Marhujinjang ma disi halak na pangpang songon ursa...(Jes 35.6" . Taingot ma ndang dihalomohon Debata mida hamatean ni parjahat..., mulak ma nian tumadingkhon dalanna (Hes 33.11).
3. "Hata hehe ma ho". Anno Jesus diboto do na di roha ni aloNa i do umbahen didok" didia do ummomo"? Dohonon tu na sarion i: Nunga sesa angka dosami! Manang dohonon: Hehe ma ho? Marhite i naeng sulingkitanta paboa maksud ni Jesus sabalikna, ia dosa ummaol do sesaon sian sahit. Lapatann, naeng patuduhoon ni Jesus na rumingkot do dosa sisean, asa sahit na porlu dipamalum. Sahit i malum satongkin, alai molo sai lohot dope dosai tontu manombo ma muse sahit i. Ndang sisongon ni sangkap ni Debata na pinangido sian angka na porsea Hehe ma ho...dihorhon i do sada sikap na maninggalhon dosa i gabe pangoloi holan tu Debata sandiri, Ditingki Debata mamangkuli angka naposoNa di Padan Narobi jotjot hatai  Hehe ma ho...dihatahon boi idaonta isara dipanghuli Debata tu Debora; Tole, tole ale Debora, tole endehon ma sada ende! Hehe ma ho...(Pang 5.12; 2 Raja 19.27). Boasa tubu pandohan i, " Laho ma ho, unang be mardosa tu joloan on (Joh 8.11.). Nungga tangkas taida pambahenan ni Debata na mangalehon hangoluan tu hita. Adong do manang piga dalan di hita laho manadinghon dosa i dingolunta; Parjolo; Ingkon olo hita paradehon tingki na soding mengevaluasi angka na taula siganup ari. Paduahonl Olo hita manangihon hata ni Debata  marhite parsaoranta dohot angka dongan dibagas ngolu siganup ari.  Patoluhon; pahibulhon manangihon panggora ni rohanta asa marhite i boi tatangihon soara ni Tondi ni Debata.

Panimpuli;

1. Unang muramura hita mandele diangka na masa dingolunta on, sai lam tapadoras ma langkanta mandapothon Tuhan(Efesus 3.20)

2. Gabe panogunogu ma hita tu donganta laho mananda Ibana (Psalm 1.1)

3. Hehe ma hita mananggalhon angka dosa dohot pangalaho na buruk manopot ngolu na imbaru.