Rom 6.18-23
gr.abnerpanjaitan
1. Malua sian Dosa i do parbue ni panobusion ni Jesus Kristus tu nasa hajolmaon. Gabe dihorhon i ma jumpang di halak na porsea i perubahan radikal jala na fundamental manghagigihon dosa. Di surat ni Apostel Paulus tu huria Rom 6 on, dipaandar jala ditulak si Paulus konsep na sala, na mandok: Boi halak na porsea i tongtong mangulahon dosa, jala na so siuhumun ibana di dosa na niulana, ala asi ni roha ni Debata di bagasan Kristus. Penyimpangan na serius do pingkiran on di halak Kristen. Poda na lilu do mangoar antinominasi sian poda asi ni roha-kasih karunia, ai gabe dipansuasaehon asi ni roha i holan laho paihutihut hagiot ni dagingna. Sasintongna halak na tutu porsea, nunga ’dibagasan Kristus’. Ala status ’dalam Kristus’ nunga pinda ibana sian gomgoman ni dosa tu hangoluan na manontong. Halak na tutu porsea, nunga spontan disirang huhut pasiding dirina sian dosa: laos ido patadahon na tutu ibana porsea tu Jesus (1 Joh 3.4-10). Dia do lapatanna? ayat 18 mandok ”Ai dung malua hamu sian dosa i, gabe tunduk do hamu mangoloi hatigoran i”. Ala ni i mustahil do hita gabe hatoban ni dosa huhut laos gabe hatoban ni Jesus (ay 11-13, 16-18). Di ayat 19 dipahantus ma perubahan orientasi hidup ni na porsea i: pasahathon diri, ruas, ngoluna singkop holan tu hatigoran, laho pabadiahonsa. Dipinsang molo sai tadatdati mardosa, asa tung timbul asi ni roha (ay 1). Dao ma i! Ndang relevan; datdatan mardosa laho manambai asi ni roha. Ndang siulaon na roa, asa ro na denggan (Rom 3.8).
2. Didok poda ni halak Batak; “Mago do pauseang anggo so adong na manungkus”. Suman tusi do Asi ni roha ni Debata tu halak na mangargahon asi ni roha, ima angka na porsea di hamatean dohot haheheon ni Jesus i. Tumangkas didok di ayat 4 ”Naung rap tartanom do hita rap dohot Ibana marhite pandidion i tubagasan hamatean, asa marparange hita tu bagasan ngolu na imbaru”. Dibagasan Kristus do adong di hita haluaon, i ma hasesaan ni angka dosa (Kol 1.14), maniru parrohaon ni Kristus Jesus (Pil 2.5-8), i ma; mangarumari diri, mangargai dohot manarihon dongan. Angka na porsea manjalo asi ni roha sian Debata dibagasan Kristus, tongtong dope nasida mangolu di portibi on na boi diela sibolis, tidak terlepas dari godaan iblis, ndang gabe bebas sian dosa. Nang pe naung manjalo asi ni roha, nang pe naung tardidi angka na porsea di Jesus i, tongtong do pe nasida mangadop di dosa. Sada siulaon ni angka naung manjalo asi ni roha i, ima dipasahat dirina tu Jesus i unang be tu dosa i. Unang be hita pangoloi tu sibolis, alai tu Tuhan i ma pangoloi tu hatigoran ma....Gabe pangoloi ma hamu nuaeng sian nasa roha muna di ruhut ni poda, naung sahat tu hamu (ay 17).
3. Ala dosa i lam bagas ma hasesega ni jolma, manghebat ma kerusakan moral, sange mangalo Debata ndang manghalomohon dalan ni Debata (pts Poda 23.22-26). Dihorhon dosa i lam lomo rohanta pasiaksiak halak, tahalomohon kekerasan, sadisme, hajahaton jala diparhatoban dosa i hita manegai, pasudahon dohot maniaphon. Lam dipahehe muse hisaphisap haotoon di hita. Molo songon i, patut digugat hita: Antong, dia do parbuemuna disi? Angka na hinahilalahonmuna anggo nuaeng, ai hamatean do hapateanna (ay 21). Molo so taparbuehon na denggan, na tongtong dope manggompang dosa i dibagasan hita, jala hatoban ni dosa dope hita. Tahatindanghon do holan sada do na boi pamatehon/melenyapkan huaso ni dosa i, ima hagogoon ni haporseaon tu Jesus Kristus dohot ulaon panobusion na pinatupa ni Jesus tu hita( Gal 3.13; Efs 4.20-24). Nian na masuk do dosa i tu hajolmaon marhite ADAM mangaramuni luhut jolma (5.12), gabe jumpang di jolma i uhuman sian Debata(1.18). On do na pinahantus di ayat 22; Alai nuaeng, dung malua hamu sian dosa, dung gabe pangoloi di Debata hamu, jala hapatean tu hangoluan na salelenglelengna. Marhite na dung malua sian dosa, dung gabe pangoloi di Debata adong ma parbue na salelenglelengna. Di ayat parpudi ayat 23 didok; Ai upa tinuhor ni dosa do hamatean; alai basabasa ni Debata do hangoluan salelenglelengna marhite Jesus Tuhanta i. Alai ndang pola beha i, ia so pamatang na olo buruk on be pangkeonta tu banuaginjang, pamatang banuaginjang nama manang badan partondi (1 Kort 15.44,46). Nunga monang Tuhan Jesus maralohon dosa, nunga ditaluhon sibolis, nunga ditaluhon hamatean.
4. Di ngolu parhuriaon nuaeng: sai hira na adong dope toleransi ni halak Kristen tu dosa. Molo tarsor mardosa, diampini do dirina, didok: Boha bahenon nda di portibi on dope hita, ndang sai tarbahen dope lias sian dosa, ninna laos huhut dipangeahon parbue ni dosana. Pasti halak na songon i sundat marparbuehon ulaon na denggan dohot habadiaon. Manang molo tarsor sasahalak mardosa, diampini ma dirina didok: Girgir do nian tondi, alai gale do ia daging. Didok rohana, ala hagaleon ni dagingna I gabe loason ni Debata ma ibana mardosai. On ma poda na lilu na sai mambahen hita marlaok dosa. Dipaingot si Petrus hita:”Ai na tarsurat do:Badia ma hamu, ai na badia do Ahu”! (1 Petr 1.16). Si Paulus mandok: Pasomalsomal ma dirim tu hadaulaton, dialo ibana hagiot ni dagingna jala dioloi ibana hagiot ni tondina. Nunga tajalo asi ni roha ni Debata marhite Jesus Kristus naung manesa dosanta, i ma hatigoran ni Debata. Siulahononta hatigoran i, paboa naung sangkambona hita dohot Tuhan Jesus. Mansohot ma mangulahon dosa angka naung manjalo asi ni roha ni Debata.Ndang be hatoban ni dosa hita nuaeng alai gabe hatoban jala pangoloi di hatigoran. Amen.
Tidak ada komentar:
Posting Komentar