Diparar Debata do hita Gabe NaposoNa

Sermon Jamita Minggu Sexagesima

Jeremia 1.4-10

Minggu 03 Pebruari 2013

1.          Martimbanghon angka panurirang na asing, adong do manang piga keistimewaan ni panurirang Jeremia (a). Nunga ditotophon Debata ibana gabe panurirang andorang dibortian ni inana dope si Jeremia. (b). Nunga diparbadia Debata ibana andorang so ruar dope sian bortian ni inana, asa talup ibana gabe panurirangNa. (c). Secara langsung do ibana dipabangkit Debata gabe panurirang tu angka bangso, ndada holan tu bangso Juda. Mansai tangkas do didok di ayat 9; Nunga sahat hulehon angka hatangku tu bagasan pamanganmu. (d). Mansai tangkas do dipasahat Debata angka tanggungjawab siulahononna songon panurirang secara negatif didok ; Mangurati dohot maniaphon, mangago dohot mangalaho, dungi secara positif didok muse; paulihon dohot manuan(ay 5,10).

2.        Alai ndang manghorhon haginjangon ni roha keistimewaan ni panjouon ni si Jeremia i. Alai dihorhon hasurungan ni panjouonna i do hajojonokna tu Debata, di parsaoran dohot di panghobasionna songon panurirang. Mansai rosu situtu do parsaoran ni panurirang Jeremia dohot Debata. Hira na maraleale do nasida, songon na targombar sian panghataion ni si Jeremia dohot Debata di bnd 20.7-20. Alai nang pe songoni hira na maraleale nasida, tongtong do dipatuduhon panurirang Jeremia serep dohot unduk ni rohana mangoloi Ibana, hombar tu pandok ni Debata : Manang tudia pe ho husuru, ingkon tusi ho laho, jala manang aha hutonahon tu ho, ingkon i do hatahononmu (ay 7). Alani mansai tangkas do dipatolhas si Jeremia hata ni Debata, ndang olo ibana palemeslemes jamitana, atik pe mansai koras jala sogo roha ni halak manangihonsa. Memang laos ala ni jamita na tegas jala koras i ma gabe godang parungkilon dohot hasusaan diae ibana. Alai ndang mabiar ibana ai pos do rohana di hata ni Debata na mandok ; Unang ho mabiar, maradophon nasida, ai sai Ahu do donganmu, paluahon ho (ay 8).

3.        Angkup ni i, atik pe godang hasurungan ni panjouonna, alai ndang gabe halak na istimewa ibana di jolo ni natorop. Mansai tangkas do dirajumi ibana dirina dos dohot halak na asing, na rap tinompa ni Debata.   Mansai tangkas do panghilalaanna i tarida sian pandohanna, songon na ni dok ni halak Batak : ramba na poso do iba, na so tubuan lata, naposo dope iba, jala na so umbotoo hata (ay 6). Alai laos disi ma dipatuduhon si Jeremia, ndang na naeng marsidalian ibana manang naeng manulak panjouon ni Debata. Ai marhite pandohan i dipatedek si Jeremia hagaleonna, laos huhut haradeonna marsiajar. Alani do umbahen dialusi Debata ibana: Unang dok; nab ajar dope ahu (ay 7). Singkat ni ganggu ni rohana mangula ulaon na pinasahat ni Debata gabe tubu pos ni roha dohot hatauon gabe naposo ni Debata. Sahat tu sadarion on pe tongtong do diparade Debata na ringkot di manang ise na rade mangoloi joujouNa. Lapatanna tung so sundat do sangkap ni Debata ala ni hagaleon manang hahurangan ni angka naposoNa; ai marhuaso do Ibana pauliulihon saluhutna asa tung saut sude sangkapNa marhitehite angka naposo na pinabangkitNa i.

4.        Marhite panjouon ni panurirang Jeremia i, naeng ditogutogu hita asa lam tangkas mangoloi Debata laho mamboan haimbaruon di masyarakat, di huria dohot di tongatonga ni masyarakat. I ma marhitehite na mangurati dohot maniaphon angka pangalaho na robi, asa jumpang parsaoran na gok dame dohot las ni roha. Ingkon lohaon jala bolongkonon ma nasa na mangambati hita mangulahon na nidok ni Debata, asa sahat pasupasu dohot hangoluan sian asi ni rohaNa. Dungi pinauli ma roha dohot pingkiran na imbaru jala sinuan ma holong ni roha, asa lam marbungaran harajaon ni Debata di portibi on. Songoni ma ganup halak Kristen dijou Debata gabe sira dohot panondang ni portibi on (Mat 5.13-14).

5.        Molo tarajumi dirinta halak na gale, na metmet, siotik partubu manang somal didok golongan minoritas, taingot be ma na dipauli Debata do haimbaruon di ngolu ni angka ni angka bangso marhite na pabangkit angka na gale dohot na metmet (jaha Ul 4.10-12). Alai dibagasan unduk dohot serep ni roha tajalo ma hagogoon dohot hatauon sian Debata marhite na manghangoluhon hataNa, songon na sinohalan ni panurirang Jeremia.  Molo dibagasan hita hasintongan ni hata ni Debata, gabe ndang mabiar be hita maradophon manang aha pe di portibi on. Gariada saleleng mangolu hita gabe pangoloi, na patolhashon dohot sintong sude na tinonahon ni Debata. Antong, marlas ni roha ma hita molo diparar Debata hita gabe naposoNa, jala tapasaut ma nanidokNa marhite pangulmiton ni ngolunta ariari. Amen